sharik-e-gham banaya bhi nahin hai

sharīk-e-ġham banāyā bhī nahīñ hai

tujhe tujh se churāyā bhī nahīñ hai

ye sāz-e-ishq maiñ ne raqs kar ke

abhī dil ko sunāyā bhī nahīñ hai

tirī tasvīr se bāteñ bahut kiiñ

magar tujh ko batāyā bhī nahīñ hai

abhī raste hamāre ham-nashīñ haiñ

abhī ghar ko sajāyā bhī nahīñ hai

mohabbat qarz hai is dil pe tere

jise tū ne chukāyā bhī nahīñ hai

bahut jaage tumhārī yaad meñ ham

magar tum ko jagāyā bhī nahīñ hai

tire dil meñ mohabbat kā sitārā

abhī to jagmagāyā bhī nahīñ hai

sharik-e-gham banaya bhi nahin hai

tujhe tujh se churaya bhi nahin hai

ye saz-e-ishq main ne raqs kar ke

abhi dil ko sunaya bhi nahin hai

teri taswir se baaten bahut kin

magar tujh ko bataya bhi nahin hai

abhi raste hamare ham-nashin hain

abhi ghar ko sajaya bhi nahin hai

mohabbat qarz hai is dil pe tere

jise tu ne chukaya bhi nahin hai

bahut jage tumhaari yaad mein hum

magar tum ko jagaya bhi nahin hai

tere dil mein mohabbat ka sitara

abhi to jagmagaya bhi nahin hai