شریک غم بنایا بھی نہیں ہے

شریک غم بنایا بھی نہیں ہے

تجھے تجھ سے چرایا بھی نہیں ہے

یہ ساز عشق میں نے رقص کر کے

ابھی دل کو سنایا بھی نہیں ہے

تری تصویر سے باتیں بہت کیں

مگر تجھ کو بتایا بھی نہیں ہے

ابھی رستے ہمارے ہم نشیں ہیں

ابھی گھر کو سجایا بھی نہیں ہے

محبت قرض ہے اس دل پہ تیرے

جسے تو نے چکایا بھی نہیں ہے

بہت جاگے تمہاری یاد میں ہم

مگر تم کو جگایا بھی نہیں ہے

ترے دل میں محبت کا ستارا

ابھی تو جگمگایا بھی نہیں ہے