sharik-e-gham koi kab moatabar nikalta hai

sharīk-e-ġham koī kab mo'atabar nikaltā hai

sivā.e dil ke so vo be-ḳhabar nikaltā hai

ye kaisā shahr hai kaisī hai sar-zamīñ us kī

jahāñ kī ḳhaak palaTtā huuñ sar nikaltā hai

jidhar haiñ pyāse udhar bārisheñ haiñ tīroñ kī

jidhar ġhanīm hai dariyā udhar nikaltā hai

use ḳhabar hai ki zulmat hai saf-ba-saf har-sū

ujālā haath meñ le kar sipar nikaltā hai

hafīz hāthoñ kā saaya hai sā.ebāñ jaisā

yaqīn hotā hai dil ko na Dar nikaltā hai

'ajīb dhund hai dasht-e-safar pe chhā.ī huī

na ḳhatm hotā hai rasta na ghar nikaltā hai

'mujībī' sauñp dī jis ko matā-e-jāñ maiñ ne

usī kā qarz mire naam par nikaltā hai

sharik-e-gham koi kab mo'atabar nikalta hai

siwae dil ke so wo be-KHabar nikalta hai

ye kaisa shahr hai kaisi hai sar-zamin us ki

jahan ki KHak palaTta hun sar nikalta hai

jidhar hain pyase udhar barishen hain tiron ki

jidhar ghanim hai dariya udhar nikalta hai

use KHabar hai ki zulmat hai saf-ba-saf har-su

ujala hath mein le kar sipar nikalta hai

hafiz hathon ka saya hai saeban jaisa

yaqin hota hai dil ko na Dar nikalta hai

'ajib dhund hai dasht-e-safar pe chhai hui

na KHatm hota hai rasta na ghar nikalta hai

'mujibi' saunp di jis ko mata-e-jaan main ne

usi ka qarz mere nam par nikalta hai