sharik-e-haal-e-dil-e-be-qarar aaj bhi hai

sharīk-e-hāl-e-dil-e-be-qarār aaj bhī hai

kisī kī yaad mirī ġham-gusār aaj bhī hai

mujhe to kal bhī na thā un par iḳhtiyār koī

aur un ko mujh pe vahī iḳhtiyār aaj bhī hai

tirī taraf se zuhūr-e-karam nahīñ na sahī

tire karam kā mujhe e'tibār aaj bhī hai

vo rasm-e-shauq kahāñ ab magar ye aalam hai

ki jaise dil ko tirā intizār aaj bhī hai

kisī kā naqsh-e-kaf-e-pā to ab kahāñ lekin

nishān-e-sajda sar-e-rahguzār aaj bhī hai

vo un kā ġham ki nigāheñ badal chukā 'aḳhtar'

kamāl-e-shauq kā parvardigār aaj bhī hai

sharik-e-haal-e-dil-e-be-qarar aaj bhi hai

kisi ki yaad meri gham-gusar aaj bhi hai

mujhe to kal bhi na tha un par iKHtiyar koi

aur un ko mujh pe wahi iKHtiyar aaj bhi hai

teri taraf se zuhur-e-karam nahin na sahi

tere karam ka mujhe e'tibar aaj bhi hai

wo rasm-e-shauq kahan ab magar ye aalam hai

ki jaise dil ko tera intizar aaj bhi hai

kisi ka naqsh-e-kaf-e-pa to ab kahan lekin

nishan-e-sajda sar-e-rahguzar aaj bhi hai

wo un ka gham ki nigahen badal chuka 'aKHtar'

kamal-e-shauq ka parwardigar aaj bhi hai