sharik-e-haal jab nakaami-e-tadbir hoti hai

sharīk-e-hāl jab nākāmī-e-tadbīr hotī hai

to phir vahshat-asar har ḳhvāb kī ta.abīr hotī hai

usī ko sirf jabr-e-zīst kā hotā hai andāza

ki jis ke paañv meñ hālāt kī zanjīr hotī hai

ġharaz se dast-bardārī hai me.arāj ādamiyyat kī

isī ehsās se kirdār kī ta.amīr hotī hai

maiñ us ko bhuul jaane kā irāda jab bhī kartā huuñ

to yaad us kī baḌī shiddat se dāman-gīr hotī hai

zarūrī hai 'zafar' ḳhūn-e-jigar kī rang-āmezī

baġhair is ke mukammal kab koī tasvīr hotī hai

sharik-e-haal jab nakaami-e-tadbir hoti hai

to phir wahshat-asar har KHwab ki tabir hoti hai

usi ko sirf jabr-e-zist ka hota hai andaza

ki jis ke panw mein haalat ki zanjir hoti hai

gharaz se dast-bardari hai mearaj aadamiyyat ki

isi ehsas se kirdar ki tamir hoti hai

main us ko bhul jaane ka irada jab bhi karta hun

to yaad us ki baDi shiddat se daman-gir hoti hai

zaruri hai 'zafar' KHun-e-jigar ki rang-amezi

baghair is ke mukammal kab koi taswir hoti hai