sharik-e-rasm-e-girya hain samundar-ashna aankhen

sharīk-e-rasm-e-girya haiñ samundar-āshnā āñkheñ

jahān-e-ārzū meñ kar na deñ mahshar bapā āñkheñ

ye patthar kī na ho jaa.eñ kahīñ aqlīm-e-hastī meñ

rakhe mahfūz āshob-e-tamannā se ḳhudā āñkheñ

tumhāre va.ada-e-shab kā yaqīñ aatā nahīñ un ko

rahīn-e-fitna-e-ġham haiñ sukūñ nā-āshnā āñkheñ

hisār-e-dasht-e-vahshat meñ bagūloñ ke ishāroñ par

hathelī par liye phirtī hai muddat se havā āñkheñ

fasīl-e-shahr-e-tārīkī se jaane kab rihā.ī ho

asīr-e-qariyā-e-shab haiñ mirī sīmāb-pā āñkheñ

tumhārī shān-e-yaktā.ī hai aalam dil-farebī kā

vagarna dekhtī haiñ yuuñ pas-e-manzar meñ kyā āñkheñ

harīm-e-nāz meñ terā na gar jalva dikhā.ī de

to behtar hai rah-e-ulfat meñ ho jaa.eñ fanā āñkheñ

huī muddat nigāhoñ se chhuā thā marmarīñ chehra

tilism-e-ḳhvāb se ab tak na ho pā.īñ rihā āñkheñ

'muzaffar' zindagī meñ farz to ik baar thā lekin

tavāf-e-ka.aba-e-dil kar chukī haiñ bārhā āñkheñ

sharik-e-rasm-e-girya hain samundar-ashna aankhen

jahan-e-arzu mein kar na den mahshar bapa aankhen

ye patthar ki na ho jaen kahin aqlim-e-hasti mein

rakhe mahfuz aashob-e-tamanna se KHuda aankhen

tumhaare wada-e-shab ka yaqin aata nahin un ko

rahin-e-fitna-e-gham hain sukun na-ashna aankhen

hisar-e-dasht-e-wahshat mein bagulon ke ishaaron par

hatheli par liye phirti hai muddat se hawa aankhen

fasil-e-shahr-e-tariki se jaane kab rihai ho

asir-e-qariya-e-shab hain meri simab-pa aankhen

tumhaari shan-e-yaktai hai aalam dil-farebi ka

wagarna dekhti hain yun pas-e-manzar mein kya aankhen

harim-e-naz mein tera na gar jalwa dikhai de

to behtar hai rah-e-ulfat mein ho jaen fana aankhen

hui muddat nigahon se chhua tha marmarin chehra

tilism-e-KHwab se ab tak na ho pain riha aankhen

'muzaffar' zindagi mein farz to ek bar tha lekin

tawaf-e-kaba-e-dil kar chuki hain barha aankhen