sharir-o-shoKH nariyan kimad belti huin

sharīr-o-shoḳh nāriyāñ kimād beltī huiiñ

vo guḌ kī garm bheliyoñ ke saath kheltī huiiñ

gulāb jaisī sūrateñ vo chāñd jaisī mūrateñ

vo talḳhī-e-hayāt ko hañsī se jheltī huiiñ

chaTān jaisī laḌkiyāñ vo saḳht-jān laḌkiyāñ

vo zindagī kī beḌiyāñ bhañvar meñ Theltī huiiñ

nikal paḌī haiñ ḳhvāb meñ samundaroñ kī sair ko

vo niile gahre aab ko pare dhakeltī huiiñ

ye vaqt hai zavāl kā vabāl kā malāl kā

hamāre sar pe āfateñ haiñ DañD peltī huiiñ

ajab sī sansanāhaTeñ vo vāhimoñ kī āhaTeñ

havā.iyāñ haiñ aañkh meñ lahū uñDeltī huiiñ

vo razmiya kahāniyāñ sarāb kāmrāniyāñ

qulābe āsmān ke zamīñ se meltī huiiñ

sharir-o-shoKH nariyan kimad belti huin

wo guD ki garm bheliyon ke sath khelti huin

gulab jaisi suraten wo chand jaisi muraten

wo talKHi-e-hayat ko hansi se jhelti huin

chaTan jaisi laDkiyan wo saKHt-jaan laDkiyan

wo zindagi ki beDiyan bhanwar mein Thelti huin

nikal paDi hain KHwab mein samundaron ki sair ko

wo nile gahre aab ko pare dhakelti huin

ye waqt hai zawal ka wabaal ka malal ka

hamare sar pe aafaten hain DanD pelti huin

ajab si sansanahaTen wo wahimon ki aahaTen

hawaiyan hain aankh mein lahu unDelti huin

wo razmiya kahaniyan sarab kaamraniyan

qulabe aasman ke zamin se melti huin