شرمیلا سورج بھی کتنا پاگل ہوتا جاتا ہے

شرمیلا سورج بھی کتنا پاگل ہوتا جاتا ہے

شبنم جیسی ہریالی کو شعلوں سے دہکاتا ہے

آج اچانک غور سے میرے چہرے کو کیوں دیکھتے ہو

لوگو تم سے تو میرا برسوں کا رشتہ ناطہ ہے

ننگی کرنیں مل کے بدن میں آئینہ وہ بن تو گیا

آنکھ ملاتے آئینے سے لیکن اب شرماتا ہے

جنم جنم کے ساتھی ہیں ہم روٹھیں گے تو مل لیں گے

یہ کہہ کر آوارہ بادل دھرتی کو بہلاتا ہے

بے موسم کا یہ ساون بھی کتنا بھولا بھالا ہے

پھینک کے ساگر میں کنکر اب خود ہی شور مچاتا ہے

دکھ کی اگنی میں آشائیں کب کی جل کر راکھ ہوئیں

پاگل منوا پھر بھی بیٹھا سکھ کی بین بجاتا ہے

آج تو ہر کوئی ہے گم اپنی ہی دھن کی سرگم میں

تیرے پھیکے سر کا اطہرؔ کون یہاں گن گاتا ہے