shauq-e-butan-e-anjuman-ara liye hue

shauq-e-butān-e-anjuman-ārā liye hue

phirtā huuñ hashr meñ vahī duniyā liye hue

aatī hai kis dimāġh se ik ik nigāh-e-husn

dil meñ hazār fitna-e-barpā liye hue

yaad aa rahī hai un kī vo tajdīd-e-iltifāt

pahlū-e-sad-nadāmat-e-īfā liye hue

kis kī talāsh hai ki sar-e-tūr is tarah

aa.e ho mish.al-e-ruḳh-e-zebā liye hue

bebāk haiñ ki jaan ke pahchānte nahīñ

merī nigāh-e-rañg-e-tamannā liye hue

ab kyā ho kaif-e-ishq ki muddat guzar ga.ī

un ke laboñ se jura-e-sahbā liye hue

phir un ko chheḌtā huuñ ki arsa bahut huā

dil se kuchh intiqām-e-tamannā liye hue

dekhā ḳhirām-e-nāz 'suhā' jā rahe haiñ vo

pastī ko sū-e-ālam-e-bālā liye hue

shauq-e-butan-e-anjuman-ara liye hue

phirta hun hashr mein wahi duniya liye hue

aati hai kis dimagh se ek ek nigah-e-husn

dil mein hazar fitna-e-barpa liye hue

yaad aa rahi hai un ki wo tajdid-e-iltifat

pahlu-e-sad-nadamat-e-ifa liye hue

kis ki talash hai ki sar-e-tur is tarah

aae ho mishal-e-ruKH-e-zeba liye hue

bebak hain ki jaan ke pahchante nahin

meri nigah-e-rang-e-tamanna liye hue

ab kya ho kaif-e-ishq ki muddat guzar gai

un ke labon se jura-e-sahba liye hue

phir un ko chheDta hun ki arsa bahut hua

dil se kuchh intiqam-e-tamanna liye hue

dekha KHiram-e-naz 'suha' ja rahe hain wo

pasti ko su-e-alam-e-baala liye hue