shauq-e-didar ne kya kya na tamasha dekha

shauq-e-dīdār ne kyā kyā na tamāshā dekhā

jān-e-man kaise batā.eñ tumheñ kyā kyā dekhā

zindagī aag hai aur aag kī ḳhātir ham ne

diip kī aañkh meñ jaltā huā chehra dekhā

maiñ ne lamhoñ meñ guzārī haiñ hazāroñ sadiyāñ

vaqt kī dhuup meñ pighlā huā dariyā dekhā

sub.h-e-raushan ne utārī haiñ sitāra āñkheñ

shāḳh-e-shamshād ne gulshan kā darīcha dekhā

rāz-e-hastī meñ zamīñ saarī tasavvur niklī

āsmāñ apne taḳhayyul kā sahīfa dekhā

dāġh-e-dāman ko uThā.e hue phirtī hai havā

dhuul hī dhuul huā saarā vo rasta dekhā

gul kī āñkhoñ meñ machaltī huī yādeñ us kī

rang-o-āhang se badaltā huā shīsha dekhā

shauq-e-didar ne kya kya na tamasha dekha

jaan-e-man kaise bataen tumhein kya kya dekha

zindagi aag hai aur aag ki KHatir hum ne

dip ki aankh mein jalta hua chehra dekha

main ne lamhon mein guzari hain hazaron sadiyan

waqt ki dhup mein pighla hua dariya dekha

subh-e-raushan ne utari hain sitara aankhen

shaKH-e-shamshad ne gulshan ka daricha dekha

raaz-e-hasti mein zamin sari tasawwur nikli

aasman apne taKHayyul ka sahifa dekha

dagh-e-daman ko uThae hue phirti hai hawa

dhul hi dhul hua sara wo rasta dekha

gul ki aankhon mein machalti hui yaaden us ki

rang-o-ahang se badalta hua shisha dekha