shauq-e-dil-e-warafta ka ek said-e-zabun hun!

shauq-e-dil-e-vārafta kā ik said-e-zabūñ huuñ!

khultā hī nahīñ bhed ki maiñ kaun huuñ kyuuñ huuñ

bas meñ hai kahāñ ahl-e-ḳhirad ke mujhe samjheñ

jo aañkh se ojhal hai maiñ vo aks-e-darūñ huuñ

ḳhāliq huuñ bahāroñ kā sar-e-gulshan-e-hastī

jo phuul khilātā hai vo ik mauja-e-ḳhūñ huuñ

maiñ dast-e-zamāna ke miTā.e na miTūñgā

ik naqsh-e-vafā huuñ ki sar-e-lauh-e-junūñ huuñ

sahbā-e-haqīqat kā huuñ sarmast azal se

ik banda-e-āzād-e-tilismāt-o-fusūñ huuñ

de mujh ko duā terī talabgār hai duniyā

tū jo mujhe samjhā hai maiñ kuchh us se fuzūñ huuñ

'nāsir' mujhe ulfat hai kisī se to ḳhatā kyaa?

maiñ halqa-e-arbāb-e-havas se to barūñ huuñ

shauq-e-dil-e-warafta ka ek said-e-zabun hun!

khulta hi nahin bhed ki main kaun hun kyun hun

bas mein hai kahan ahl-e-KHirad ke mujhe samjhen

jo aankh se ojhal hai main wo aks-e-darun hun

KHaliq hun bahaaron ka sar-e-gulshan-e-hasti

jo phul khilata hai wo ek mauja-e-KHun hun

main dast-e-zamana ke miTae na miTunga

ek naqsh-e-wafa hun ki sar-e-lauh-e-junun hun

sahba-e-haqiqat ka hun sarmast azal se

ek banda-e-azad-e-tilismat-o-fusun hun

de mujh ko dua teri talabgar hai duniya

tu jo mujhe samjha hai main kuchh us se fuzun hun

'nasir' mujhe ulfat hai kisi se to KHata kya?

main halqa-e-arbab-e-hawas se to barun hun