shauq-e-dil fikr-e-dahan mein hai jo rahbar ki tarah

shauq-e-dil fikr-e-dahan meñ hai jo rahbar kī tarah

DhūñDhtā huuñ chashma-e-haivāñ sikandar kī tarah

merī aahoñ ko abas hai nā-rasā.ī kā gila

dil meñ ghar karnā to sīkheñ yād-e-dilbar kī tarah

sar se pā tak hai misāl-e-gardan-e-taslīm ḳham

kis se hotā hai adab qātil kā ḳhanjar kī tarah

thā jo vaqt-e-qatl armān-e-ham-āġhoshī mujhe

ḳhuuñ kī chhīñTeñ lipTī haiñ ḳhanjar se jauhar kī tarah

dard-e-dil uTh uTh ke Dhātā hai qayāmat jaan par

shām-e-hijr-e-āshiqāñ hai sub.h-e-mahshar kī tarah

dil ko āñkhoñ ne sujhā.ī haiñ jo rāheñ ishq kī

har jagah mujh ko liye phirtā hai rahbar kī tarah

yād-e-gesū ik balā-e-jāñ-sitāñ hai hijr meñ

kaaTe khātā hai mirā ghar mujh ko azhdar kī tarah

is ko lutf-e-dard us ko lazzat-e-mashq-e-jafā

dil kī aadat bigḌī hai ḳhū-e-sitamgar kī tarah

un kī aamad kī ḳhabar sun kar hujūm-e-shauq se

kashmakash hai ḳhāna-e-dil meñ bhare ghar kī tarah

misl-e-dīvāna phirā kartā hai kyoñ ye roz-o-shab

āsmāñ ko bhī hai kyā saudā mire sar kī tarah

aap kī ġhaflat se saarī ārzūeñ mar ga.iiñ

dil mirā vīrān hai ujḌe hue ghar kī tarah

ban ke shabnam laakh Tapkeñ chashm-e-aḳhtar se sarishk

ro.egā kyā āsmāñ us dīda-e-tar kī tarah

TukḌe TukḌe dil jigar haiñ tez fiqroñ se huzūr

aap kī teġh-e-zabāñ chaltī hai ḳhanjar kī tarah

raah meñ dil nīchī nazroñ se huā jaatā hai zab.h

jhuk ke bhī chaltā hai vo qātil to ḳhanjar kī tarah

shukr-e-ḳhāliq hai ki be-minnat maiñ hotā huuñ shahīd

dil ko yād-e-abrū-e-qātil hai ḳhanjar kī tarah

tauba tauba kyā ġhazab saaqī kī ġhaflat ne kiyā

sab kī sūrat dekhtā huuñ riñd-e-be-zar kī tarah

hijr-e-sāqī meñ nazar aayā kahīñ gar shaġhl-e-mai

DabDabā.e dīda-e-tar chashm-e-sāġhar kī tarah

ārzū-e-vasl-e-qātil itnī hai mujh zaar ko

huuñ hama-tan sūrat-e-āġhosh ḳhanjar kī tarah

ai 'nazar' ishq-e-miyān-e-yār kā hai ye asar

jism-e-lāġhar jo nihāñ hai jaañ ke jauhar kī tarah

shauq-e-dil fikr-e-dahan mein hai jo rahbar ki tarah

DhunDhta hun chashma-e-haiwan sikandar ki tarah

meri aahon ko abas hai na-rasai ka gila

dil mein ghar karna to sikhen yaad-e-dilbar ki tarah

sar se pa tak hai misal-e-gardan-e-taslim KHam

kis se hota hai adab qatil ka KHanjar ki tarah

tha jo waqt-e-qatl arman-e-ham-aghoshi mujhe

KHun ki chhinTen lipTi hain KHanjar se jauhar ki tarah

dard-e-dil uTh uTh ke Dhata hai qayamat jaan par

sham-e-hijr-e-ashiqan hai subh-e-mahshar ki tarah

dil ko aankhon ne sujhai hain jo rahen ishq ki

har jagah mujh ko liye phirta hai rahbar ki tarah

yaad-e-gesu ek bala-e-jaan-sitan hai hijr mein

kaTe khata hai mera ghar mujh ko azhdar ki tarah

is ko lutf-e-dard us ko lazzat-e-mashq-e-jafa

dil ki aadat bigDi hai KHu-e-sitamgar ki tarah

un ki aamad ki KHabar sun kar hujum-e-shauq se

kashmakash hai KHana-e-dil mein bhare ghar ki tarah

misl-e-diwana phira karta hai kyon ye roz-o-shab

aasman ko bhi hai kya sauda mere sar ki tarah

aap ki ghaflat se sari aarzuen mar gain

dil mera viran hai ujDe hue ghar ki tarah

ban ke shabnam lakh Tapken chashm-e-aKHtar se sarishk

roega kya aasman us dida-e-tar ki tarah

TukDe TukDe dil jigar hain tez fiqron se huzur

aap ki tegh-e-zaban chalti hai KHanjar ki tarah

rah mein dil nichi nazron se hua jata hai zabh

jhuk ke bhi chalta hai wo qatil to KHanjar ki tarah

shukr-e-KHaliq hai ki be-minnat main hota hun shahid

dil ko yaad-e-abru-e-qatil hai KHanjar ki tarah

tauba tauba kya ghazab saqi ki ghaflat ne kiya

sab ki surat dekhta hun rind-e-be-zar ki tarah

hijr-e-saqi mein nazar aaya kahin gar shaghl-e-mai

DabDabae dida-e-tar chashm-e-saghar ki tarah

aarzu-e-wasl-e-qatil itni hai mujh zar ko

hun hama-tan surat-e-aghosh KHanjar ki tarah

ai 'nazar' ishq-e-miyan-e-yar ka hai ye asar

jism-e-laghar jo nihan hai jaan ke jauhar ki tarah