شوق جنوں کے واسطے دل کا سکوں گیا

شوق جنوں کے واسطے دل کا سکوں گیا

مٹھی سے جیسے ریت پھسلتی ہے یوں گیا

چشم گراں نے دم لیا منظر کشی سے اب

آنکھوں کی بھوک مٹ گئی شوق دروں گیا

چرچا تھا اس کے شہر میں قاتل نظر ہے وہ

اس کی گلی میں جو بھی گیا سرنگوں گیا

آتے تھے پہلے مجھ کو فسوں زندگانی کے

جب سے گیا ہے وہ مرا ذوق فسوں گیا

مارا ہے اس طرح سے مجھے ہجر یار نے

پیکر سے جاں نکل گئی رگ رگ سے خوں گیا

یہ زندگی مجھے کرے یوں حوصلہ عطا

کوئی ترا جو پوچھ لے ہنس کے کہوں گیا