shauq ke KHwab-e-pareshan ki hain tafsiren bahut

shauq ke ḳhvāb-e-pareshāñ kī haiñ tafsīreñ bahut

dāman-e-dil par ubhar aa.ī haiñ tasvīreñ bahut

dostoñ kī bazm meñ kuchh soch kar lab sī liye

varna dāmān-e-tasavvur meñ haiñ taqrīreñ bahut

zindagī tere liye daftar kahāñ se lā.iye

chand bosīda varaq haiñ aur tahrīreñ bahut

ḳhvāhisheñ hī ḳhvāhisheñ haiñ hasrateñ hī hasrateñ

dil sā dīvāna salāmat hai to zanjīreñ bahut

baat itnī hai koī ho to sazāvār-e-salīb

is ga.e-guzre zamāne meñ bhī ta.azīreñ bahut

zindagī kī talḳh tar sachchā.iyoñ kā kyā ilaaj

yuuñ to ahl-e-maslahat karte haiñ tadbīreñ bahut

kārobār-e-shauq kī hāsil haiñ vo paspā.iyāñ

jin pe 'tābāñ' naaz farmātī haiñ taqdīreñ bahut

shauq ke KHwab-e-pareshan ki hain tafsiren bahut

daman-e-dil par ubhar aai hain taswiren bahut

doston ki bazm mein kuchh soch kar lab si liye

warna daman-e-tasawwur mein hain taqriren bahut

zindagi tere liye daftar kahan se laiye

chand bosida waraq hain aur tahriren bahut

KHwahishen hi KHwahishen hain hasraten hi hasraten

dil sa diwana salamat hai to zanjiren bahut

baat itni hai koi ho to sazawar-e-salib

is gae-guzre zamane mein bhi taziren bahut

zindagi ki talKH tar sachchaiyon ka kya ilaj

yun to ahl-e-maslahat karte hain tadbiren bahut

karobar-e-shauq ki hasil hain wo paspaiyan

jin pe 'taban' naz farmati hain taqdiren bahut