shauq ki kya hai ada dekh le parwane mein

shauq kī kyā hai adā dekh le parvāne meñ

jis ko tāḳhīr gavārā nahīñ miT jaane meñ

ruḳh pe vahshat namī āñkhoñ meñ laboñ par aaheñ

kis ke ġham se machī halchal hai ye dīvāne meñ

vo nazar aa.eñ to phir kaun kisī ko dekhe

imtihāñ to hai vafā kā na nazar aane meñ

vaj.h-e-taskīñ hai agar kuchh to hai ḳhushnūdī terī

kyā kashish ahl-e-mohabbat ko jazā paane meñ

un ke qurbāñ ki hameñ raah dikhā dī ghar kī

kyā halākat ke sivā aur thā vīrāne meñ

qalb-o-jāñ fikr-e-do-ālam se rihā.ī pā leñ

bhar de saaqī mai-e-vahdat mire paimāne meñ

saath īmān ke pā jaa.eñ 'salīm' is se najāt

mutma.in kaun hai duniyā ke balā-ḳhāne meñ

shauq ki kya hai ada dekh le parwane mein

jis ko taKHir gawara nahin miT jaane mein

ruKH pe wahshat nami aankhon mein labon par aahen

kis ke gham se machi halchal hai ye diwane mein

wo nazar aaen to phir kaun kisi ko dekhe

imtihan to hai wafa ka na nazar aane mein

wajh-e-taskin hai agar kuchh to hai KHushnudi teri

kya kashish ahl-e-mohabbat ko jaza pane mein

un ke qurban ki hamein rah dikha di ghar ki

kya halakat ke siwa aur tha virane mein

qalb-o-jaan fikr-e-do-alam se rihai pa len

bhar de saqi mai-e-wahdat mere paimane mein

sath iman ke pa jaen 'salim' is se najat

mutmain kaun hai duniya ke bala-KHane mein