shauq ne ishrat ka saman kar diya

shauq ne ishrat kā sāmāñ kar diyā

dil ko mahv-e-rū-e-jānāñ kar diyā

tū ne ai jam.iyat-e-dil kī havas

aur bhī mujh ko pareshāñ kar diyā

vaah re zaḳhm-e-mohabbat kī ḳhalish

jis ko dil ne rāhat-e-jāñ kar diyā

ḳhud-numā.ī ḳhud-faroshī ho ga.ī

aap ne apne ko arzāñ kar diyā

un ke dāman tak na pahuñchā dast-e-shauq

us ko masrūf-e-garebāñ kar diyā

bazm meñ jab ġhair par Daalī nazar

aap ne mujh par bhī ehsāñ kar diyā

kuchh baḌhā kar maiñ ne bahr-e-sharh-e-ġham

chaak ko unvān-e-dāmāñ kar diyā

jhuk ga.ī āḳhir hayā se un kī aañkh

shauq ne mujh ko pashīmāñ kar diyā

pā-e-but par maiñ ne do sajde kiye

kufr ko bhī juzv-e-īmāñ kar diyā

use ḳhayāl-e-laila-e-majnūñ-navāz

tū ne sahrā ko gulistāñ kar diyā

ho ke zaa.il quvvat-e-ehsās ne

mushkiloñ ko merī āsāñ kar diyā

dil nahīñ jaatā thā sū-e-rāh-e-dair

kaise kāfir ko musalmāñ kar diyā

tū ne 'vahshat' kyuuñ ḳhilāf-e-rasm-e-ishq

dard ko rusvā-e-darmāñ kar diyā

shauq ne ishrat ka saman kar diya

dil ko mahw-e-ru-e-jaanan kar diya

tu ne ai jamiyat-e-dil ki hawas

aur bhi mujh ko pareshan kar diya

wah re zaKHm-e-mohabbat ki KHalish

jis ko dil ne rahat-e-jaan kar diya

KHud-numai KHud-faroshi ho gai

aap ne apne ko arzan kar diya

un ke daman tak na pahuncha dast-e-shauq

us ko masruf-e-gareban kar diya

bazm mein jab ghair par Dali nazar

aap ne mujh par bhi ehsan kar diya

kuchh baDha kar main ne bahr-e-sharh-e-gham

chaak ko unwan-e-daman kar diya

jhuk gai aaKHir haya se un ki aankh

shauq ne mujh ko pashiman kar diya

pa-e-but par main ne do sajde kiye

kufr ko bhi juzw-e-iman kar diya

use KHayal-e-laila-e-majnun-nawaz

tu ne sahra ko gulistan kar diya

ho ke zail quwwat-e-ehsas ne

mushkilon ko meri aasan kar diya

dil nahin jata tha su-e-rah-e-dair

kaise kafir ko musalman kar diya

tu ne 'wahshat' kyun KHilaf-e-rasm-e-ishq

dard ko ruswa-e-darman kar diya