shauq se nakaami ki badaulat kucha-e-dil hi chhuT gaya

shauq se nākāmī kī badaulat kūcha-e-dil hī chhūT gayā

saarī umīdeñ TuuT ga.iiñ dil baiTh gayā jī chhūT gayā

fasl-e-gul aa.ī yā ajal aa.ī kyuuñ dar-e-zindāñ khultā hai

kyā koī vahshī aur aa pahuñchā yā koī qaidī chhūT gayā

lījiye kyā dāman kī ḳhabar aur dast-e-junūñ ko kyā kahiye

apne hī haath se dil kā dāman muddat guzrī chhūT gayā

manzil-e-ishq pe tanhā pahuñche koī tamannā saath na thī

thak thak kar is raah meñ āḳhir ik ik sāthī chhūT gayā

us ne adū kā sog kiyā yaañ is se vafā kī aas bañdhī

dāġh-e-tamannā rañg-e-hinā kī dekhā-dekhī chhūT gayā

'fānī' ham to jīte-jī vo mayyat haiñ be-gor-o-kafan

ġhurbat jis ko raas na aa.ī aur vatan bhī chhūT gayā

shauq se nakaami ki badaulat kucha-e-dil hi chhuT gaya

sari umiden TuT gain dil baiTh gaya ji chhuT gaya

fasl-e-gul aai ya ajal aai kyun dar-e-zindan khulta hai

kya koi wahshi aur aa pahuncha ya koi qaidi chhuT gaya

lijiye kya daman ki KHabar aur dast-e-junun ko kya kahiye

apne hi hath se dil ka daman muddat guzri chhuT gaya

manzil-e-ishq pe tanha pahunche koi tamanna sath na thi

thak thak kar is rah mein aaKHir ek ek sathi chhuT gaya

us ne adu ka sog kiya yan is se wafa ki aas bandhi

dagh-e-tamanna rang-e-hina ki dekha-dekhi chhuT gaya

'fani' hum to jite-ji wo mayyat hain be-gor-o-kafan

ghurbat jis ko ras na aai aur watan bhi chhuT gaya