شعر گوئی کے اس آزار میں شل ہونے تک

شعر گوئی کے اس آزار میں شل ہونے تک

مستقل سوچتا رہتا ہوں غزل ہونے تک

تیری قربت سے کئی راز کھلے ہیں مجھ پر

دل معمہ تھا مجھے عشق میں حل ہونے تک

بستر مرگ پہ ہوں اور یہ پوچھوں سب سے

نیند آ جائے گی کیا صبح اجل ہونے تک

دھندھلے دھندھلے سے نظر آتے تھے منظر مجھ کو

صنف گویائی کو آنکھوں کا بدل ہونے تک

خاک بس خاک ہی ہوتی ہے رگ جاں کے بغیر

حکم بس حکم ہی رہتا ہے عمل ہونے تک

کتنے ہاتھوں کو قلم کر دیا جاتا ہے یہاں

تربت عشق کو اک تاج محل ہونے تک

کل مجھے وصل کے امکان بہت ہیں ہرشتؔ

عمر لگتی ہے مگر آج سے کل ہونے تک