sher-goi mein sada meyar-e-fan rakkha karo

sher-goī meñ sadā meyār-e-fan rakkhā karo

aur samundar fikr kā bhī maujzan rakkhā karo

vahshateñ tanhā.iyoñ kī tum ko ghere hoñ agar

ḳhud hī apnī zaat meñ ik anjuman rakkhā karo

mujh ko vaise farq is se kuchh bhī ab paḌnā nahīñ

be-ruḳhī mujh se rakho yā merā man rakkhā karo

ġhībat o buġhz o anā ko chhoḌ do sab ke liye

bad-gumānī duur kar lo husn-e-zan rakkhā karo

ye na socho yaar se haiñ naf.a-o-nuqsān kyā

yaar kī yādoñ meñ bas ḳhud ko magan rakkhā karo

jab ḳhirad vāloñ meñ jaao to junūñ bhī saath ho

apnī dānā.ī meñ kuchh dīvāna-pan rakkhā karo

us kā jalva aañkh se to dekhnā mumkin nahīñ

zehn-o-dil meñ hī use jalva-fagan rakkhā karo

jahl kī aur kufr kī sab zulmateñ chhañT jā.eñgī

ka.aba-e-dil ke liye ik barhaman rakkhā karo

tum ki ‘aḳhtar-hāshmī’ gumnām ho to kyā huā

ḳhud ko apne vāste mahv-e-suḳhan rakkhā karo

sher-goi mein sada meyar-e-fan rakkha karo

aur samundar fikr ka bhi maujzan rakkha karo

wahshaten tanhaiyon ki tum ko ghere hon agar

KHud hi apni zat mein ek anjuman rakkha karo

mujh ko waise farq is se kuchh bhi ab paDna nahin

be-ruKHi mujh se rakho ya mera man rakkha karo

ghibat o bughz o ana ko chhoD do sab ke liye

bad-gumani dur kar lo husn-e-zan rakkha karo

ye na socho yar se hain nafa-o-nuqsan kya

yar ki yaadon mein bas KHud ko magan rakkha karo

jab KHirad walon mein jao to junun bhi sath ho

apni danai mein kuchh diwana-pan rakkha karo

us ka jalwa aankh se to dekhna mumkin nahin

zehn-o-dil mein hi use jalwa-fagan rakkha karo

jahl ki aur kufr ki sab zulmaten chhanT jaengi

kaba-e-dil ke liye ek barhaman rakkha karo

tum ki ‘aKHtar-hashmi’ gumnam ho to kya hua

KHud ko apne waste mahw-e-suKHan rakkha karo