خوشیوں نے انتظار کرایا ہے عمر بھر

خوشیوں نے انتظار کرایا ہے عمر بھر

اجڑا ہوا دیار سجایا ہے عمر بھر

چھوٹے سے کام میں بھی بہت خرچ میں ہوا

مجھ کو یوں زندگی نے ستایا ہے عمر بھر

ہر وقت جو چراغ ہوا کی نظر میں تھا

ہم نے وہی چراغ جلایا ہے عمر بھر

اپنا رہا نہیں ہے مکمل کوئی پتہ

خوابوں کا ایک شہر بسایا ہے عمر بھر

مجھ کو اگر ذرا سا دیا ہے تو بعد میں

احسان زندگی نے جتایا ہے عمر بھر

دو چار شعر کہہ بھی سکا وہ بھی اس لیے

ہم نے غزل پہ عشق لٹایا ہے عمر بھر