شعار درد کو غم کو اصول کر بھی لیا

شعار درد کو غم کو اصول کر بھی لیا

کہا بھی عشق کو کار فضول کر بھی لیا

تجھے ابھی ہے تامل جسے سنانے میں

ترا وہ فیصلہ ہم نے قبول کر بھی لیا

تمام شہر مرے ہونٹ چومنے آیا

کبھی جو نام ترا میں نے بھول کر بھی لیا

زمانہ اس کو مرا معجزہ شمار کرے

اٹھے نہ پاؤں بھی رستے کو دھول کر بھی لیا

گلی گلی میں مہک میرے شعر کی پہنچی

عطا جو زخم ہوئے ان کو پھول کر بھی لیا

وہ آنکھ بھیجتی تھی سینکڑوں پیام مجھے

اک آدھ بار تو میں نے وصول کر بھی لیا

ابھی تو ٹھیک سے آئی نہیں تھی سانس مجھے

کہ اگلے شعر نے دل پر نزول کر بھی لیا

چرا کے لے گئی خوشبو کلی کے کھلتے ہی

ہوا نے پھول سے بھتہ وصول کر بھی لیا