shiar dard ko gham ko usul kar bhi liya

shi'ār dard ko ġham ko usuul kar bhī liyā

kahā bhī 'ishq ko kār-e-fuzūl kar bhī liyā

tujhe abhī hai ta.ammul jise sunāne meñ

tirā vo faisla ham ne qubūl kar bhī liyā

tamām shahr mire hoñT chūmne aayā

kabhī jo naam tirā maiñ ne bhuul kar bhī liyā

zamāna us ko mirā mo'jiza shumār kare

uThe na paañv bhī raste ko dhuul kar bhī liyā

galī galī meñ mahak mere she'r kī pahuñchī

'atā jo zaḳhm hue un ko phuul kar bhī liyā

vo aañkh bhejtī thī saiñkaḌoñ payām mujhe

ik-ādh baar to maiñ ne vasūl kar bhī liyā

abhī to Thiik se aa.ī nahīñ thī saañs mujhe

ki agle she'r ne dil par nuzūl kar bhī liyā

churā ke le ga.ī ḳhushbū kalī ke khilte hī

havā ne phuul se bhatta vasūl kar bhī liyā

shi'ar dard ko gham ko usul kar bhi liya

kaha bhi 'ishq ko kar-e-fuzul kar bhi liya

tujhe abhi hai tammul jise sunane mein

tera wo faisla hum ne qubul kar bhi liya

tamam shahr mere honT chumne aaya

kabhi jo nam tera main ne bhul kar bhi liya

zamana us ko mera mo'jiza shumar kare

uThe na panw bhi raste ko dhul kar bhi liya

gali gali mein mahak mere she'r ki pahunchi

'ata jo zaKHm hue un ko phul kar bhi liya

wo aankh bhejti thi sainkaDon payam mujhe

ik-adh bar to main ne wasul kar bhi liya

abhi to Thik se aai nahin thi sans mujhe

ki agle she'r ne dil par nuzul kar bhi liya

chura ke le gai KHushbu kali ke khilte hi

hawa ne phul se bhatta wasul kar bhi liya