shiddat-e-dard ko kuchh aur baDha sakta hai

shiddat-e-dard ko kuchh aur baḌhā saktā hai

qaid-e-tanhā.ī kā ġham aap ko khā saktā hai

muntazir rahtā nahīñ hai vo kisī lamhe kā

ġham kā bādal to kisī vaqt bhī chhā saktā hai

yā vo qatra hai mirā dil jo rahe āñkhoñ meñ

yā vo dariyā hai jo kuuze meñ samā saktā hai

ġham bhulāne ko use de duuñ dilāsa lekin

ye dilāsa use ġham yaad dilā saktā hai

dost mujh ko jo banātā hai ġharaz kī ḳhātir

vaqt par haath vo dushman se milā saktā hai

jashn ḳhushiyoñ kā manātā hī nahīñ hai jo kabhī

ain mumkin hai vo har dard chhupā saktā hai

gardan-e-amn pe dahshat kī chhurī hai 'anjum'

kaun aise meñ phir āvāz uThā saktā hai

shiddat-e-dard ko kuchh aur baDha sakta hai

qaid-e-tanhai ka gham aap ko kha sakta hai

muntazir rahta nahin hai wo kisi lamhe ka

gham ka baadal to kisi waqt bhi chha sakta hai

ya wo qatra hai mera dil jo rahe aankhon mein

ya wo dariya hai jo kuze mein sama sakta hai

gham bhulane ko use de dun dilasa lekin

ye dilasa use gham yaad dila sakta hai

dost mujh ko jo banata hai gharaz ki KHatir

waqt par hath wo dushman se mila sakta hai

jashn KHushiyon ka manata hi nahin hai jo kabhi

ain mumkin hai wo har dard chhupa sakta hai

gardan-e-amn pe dahshat ki chhuri hai 'anjum'

kaun aise mein phir aawaz uTha sakta hai