shiddat-e-gham se jo KHamosh zaban hoti hai

shiddat-e-ġham se jo ḳhāmosh zabāñ hotī hai

dil kī har baat nigāhoñ se bayāñ hotī hai

yahī shabnam jo gul-o-ġhuncha kī jaañ hotī hai

ba.az auqāt gulistāñ pe girāñ hotī hai

bas vahīñ sāhil-e-ummīd ubhar aatā hai

kashti-e-dil ba-ḳhushī ġharq jahāñ hotī hai

ahl-e-dil ahl-e-yaqīñ ahl-e-amal ke aage

raah dushvār bhī dushvār kahāñ hotī hai

kashtī-e-umr hai tūfān-e-havādis meñ magar

ġharq hotī hai ye zālim na ravāñ hotī hai

ham to dīvāna-e-manzil haiñ hameñ kyā ma.alūm

sub.h hotī hai kahāñ shaam kahāñ hotī hai

kah do gulchīñ se ki phūloñ ko sañbhal kar toḌe

inhīñ phūloñ meñ nihāñ barq-e-tapāñ hotī hai

shiddat-e-gham se jo KHamosh zaban hoti hai

dil ki har baat nigahon se bayan hoti hai

yahi shabnam jo gul-o-ghuncha ki jaan hoti hai

baz auqat gulistan pe giran hoti hai

bas wahin sahil-e-ummid ubhar aata hai

kashti-e-dil ba-KHushi gharq jahan hoti hai

ahl-e-dil ahl-e-yaqin ahl-e-amal ke aage

rah dushwar bhi dushwar kahan hoti hai

kashti-e-umr hai tufan-e-hawadis mein magar

gharq hoti hai ye zalim na rawan hoti hai

hum to diwana-e-manzil hain hamein kya malum

subh hoti hai kahan sham kahan hoti hai

kah do gulchin se ki phulon ko sanbhal kar toDe

inhin phulon mein nihan barq-e-tapan hoti hai