shiddat-e-gham se meri jaan pe ban aai hai

shiddat-e-ġham se mirī jaan pe ban aa.ī hai

aur idhar us ne na aane kī qasam khaa.ī hai

dekh le kyā banī durgat tire dīvāne kī

tifl haiñ sang-ba-dast shahr tamāshā.ī hai

maiñ duā māñgūñ ḳhudā us ko amaañ meñ rakkhe

aur use mere taḌapne kī adā bhaa.ī hai

us ke haiñ saare takalluf ruḳh-e-zebā ke liye

zulf kab us ne mire vāste suljhā.ī hai

zahr-e-ġham mujh ko pilātā rahā jur.a jur.a

vaah kyā kahnā kyā andāz-e-masīhā.ī hai

tū ne kī zid to sunā dī hai kahānī apnī

ham-nashīñ aañkh tirī kis liye bhar aa.ī hai

kar liyā raunaq-e-duniyā se kinārā 'shāhid'

ik tirī yaad hai aur gosha-e-tanhā.ī hai

shiddat-e-gham se meri jaan pe ban aai hai

aur idhar us ne na aane ki qasam khai hai

dekh le kya bani durgat tere diwane ki

tifl hain sang-ba-dast shahr tamashai hai

main dua mangun KHuda us ko aman mein rakkhe

aur use mere taDapne ki ada bhai hai

us ke hain sare takalluf ruKH-e-zeba ke liye

zulf kab us ne mere waste suljhai hai

zahr-e-gham mujh ko pilata raha jura jura

wah kya kahna kya andaz-e-masihai hai

tu ne ki zid to suna di hai kahani apni

ham-nashin aankh teri kis liye bhar aai hai

kar liya raunaq-e-duniya se kinara 'shahid'

ek teri yaad hai aur gosha-e-tanhai hai