shiddat-e-izhaar-e-mazmun se hai ghabrai hui

shiddat-e-iz.hār-e-mazmūñ se hai ghabrā.ī huī

terī be-unvāñ kahānī lab pe sharmā.ī huī

maiñ sarāpā jurm jannat se nikālā to gayā

Darte Darte pūchhtā huuñ kis kī rusvā.ī huī

ek sannāTā hai dil meñ ik tasavvur aap kā

ik qayāmat par qayāmat dūsrī aa.ī huī

imtiyāz-e-sūrat-o-ma.anī ke parde chaak haiñ

yā tire chehre pe mastī kī ghaTā chhā.ī huī

aarzū fitne jagā.e dil meñ thī ab hai magar

is qayāmat ke jahāñ ko niind sī aa.ī huī

husn harjā.ī hai 'bismil' ishq kī lazzat ga.ī

andalīb-e-vaqt har ik gul kī shaidā.ī huī

shiddat-e-izhaar-e-mazmun se hai ghabrai hui

teri be-unwan kahani lab pe sharmai hui

main sarapa jurm jannat se nikala to gaya

Darte Darte puchhta hun kis ki ruswai hui

ek sannaTa hai dil mein ek tasawwur aap ka

ek qayamat par qayamat dusri aai hui

imtiyaz-e-surat-o-mani ke parde chaak hain

ya tere chehre pe masti ki ghaTa chhai hui

aarzu fitne jagae dil mein thi ab hai magar

is qayamat ke jahan ko nind si aai hui

husn harjai hai 'bismil' ishq ki lazzat gai

andalib-e-waqt har ek gul ki shaidai hui