shiddat-e-jazb mein jab aalam-e-hu bolta hai

shiddat-e-jazb meñ jab ālam-e-hū boltā hai

mai-e-gul-rañg chhalaktī hai subū boltā hai

dil kā ā.īna khulā ho to sukūt-e-shab meñ

maiñ bayāñ kartā huuñ ḳhud ko kabhī tū boltā hai

jagmagā uThtā hai dam-bhar meñ chaman-zār-e-ḳhayāl

chāñd pahlū meñ utar kar lab-e-jū boltā hai

mausam-e-barf meñ har raat guzartī hai magar

gāhe-gāhe sahī ḳhvābīda lahū boltā hai

kyuuñ darīda hai badan kyā kahūñ kis se bolūñ

maiñ kahūñ yā na kahūñ tār-e-rafū boltā hai

dast-e-qātil kā hunar laakh chhupā.e lekin

āb-e-ḳhanjar na sahī zaḳhm-e-gulū boltā hai

lazzat-e-sajda atā hone se pahle hī 'shamīm'

har bun-e-mū se mirā āb-e-vuzū boltā hai

shiddat-e-jazb mein jab aalam-e-hu bolta hai

mai-e-gul-rang chhalakti hai subu bolta hai

dil ka aaina khula ho to sukut-e-shab mein

main bayan karta hun KHud ko kabhi tu bolta hai

jagmaga uThta hai dam-bhar mein chaman-zar-e-KHayal

chand pahlu mein utar kar lab-e-ju bolta hai

mausam-e-barf mein har raat guzarti hai magar

gahe-gahe sahi KHwabida lahu bolta hai

kyun darida hai badan kya kahun kis se bolun

main kahun ya na kahun tar-e-rafu bolta hai

dast-e-qatil ka hunar lakh chhupae lekin

aab-e-KHanjar na sahi zaKHm-e-gulu bolta hai

lazzat-e-sajda ata hone se pahle hi 'shamim'

har bun-e-mu se mera aab-e-wuzu bolta hai