شیرازۂ وجود بکھرنے نہیں دیا

شیرازۂ وجود بکھرنے نہیں دیا

دریائے خواب شہر اترنے نہیں دیا

کچھ کو نہ کرنی آئی سلیقے سے زندگی

اور زندگی کے شوق نے مرنے نہیں دیا

جس میں کچھ اختیار کے چہرے دکھائی دیں

وہ آئنہ ہی آئینہ گر نے نہیں دیا

کچے گھڑے کا کچا سہارا نہ ڈھونڈیئے

اس نے کسی کو پار اترنے نہیں دیا

جب اس کو بھولنا ہے تو اتنا بھی ربط کیوں

دل نے پھر اس گلی سے گزرنے نہیں دیا

وہ قطرہ قطرہ دل پہ برستے ہیں روز و شب

جن آنسوؤں سے آنکھ کو بھرنے نہیں دیا

اک آس ہے کہ خواہشیں باندھی ہیں جس کے ساتھ

اک خواب ہے کہ جس کو بکھرنے نہیں دیا