shiraaza-e-wajud bikharne nahin diya

shīrāza-e-vajūd bikharne nahīñ diyā

dariyā-e-ḳhvāb-e-shahr utarne nahīñ diyā

kuchh ko na karnī aa.ī salīqe se zindagī

aur zindagī ke shauq ne marne nahīñ diyā

jis meñ kuchh iḳhtiyār ke chehre dikhā.ī deñ

vo aa.ina hī ā.ina-gar ne nahīñ diyā

kachche ghaḌe kā kachchā sahārā na DhūñDhiye

us ne kisī ko paar utarne nahīñ diyā

jab us ko bhūlnā hai to itnā bhī rabt kyoñ

dil ne phir us galī se guzarne nahīñ diyā

vo qatra qatra dil pe baraste haiñ roz-o-shab

jin āñsuoñ se aañkh ko bharne nahīñ diyā

ik aas hai ki ḳhvāhisheñ bāñdhī haiñ jis ke saath

ik ḳhvāb hai ki jis ko bikharne nahīñ diyā

shiraaza-e-wajud bikharne nahin diya

dariya-e-KHwab-e-shahr utarne nahin diya

kuchh ko na karni aai saliqe se zindagi

aur zindagi ke shauq ne marne nahin diya

jis mein kuchh iKHtiyar ke chehre dikhai den

wo aaina hi aaina-gar ne nahin diya

kachche ghaDe ka kachcha sahaara na DhunDhiye

us ne kisi ko par utarne nahin diya

jab us ko bhulna hai to itna bhi rabt kyon

dil ne phir us gali se guzarne nahin diya

wo qatra qatra dil pe baraste hain roz-o-shab

jin aansuon se aankh ko bharne nahin diya

ek aas hai ki KHwahishen bandhi hain jis ke sath

ek KHwab hai ki jis ko bikharne nahin diya