shishe ka ghar samajh ke jo mail hue hain log

shīshe kā ghar samajh ke jo maa.il hue haiñ log

ḳhud apne pattharoñ se hī ghā.il hue haiñ log

hal ho nahīñ rahe haiñ hazāroñ nashist meñ

kuchh is tarah se uljhe masā.il hue haiñ log

chehroñ pe ġham kī sūiyāñ chaltī haiñ roz-o-shab

jaise purānī ghaḌiyoñ ke Dial hue haiñ log

ābādiyoñ kī barf kī sil par khaḌe hue

sahrā kī tarah pyaas ke saa.il hue haiñ log

roz-o-shab-e-hayāt ke ḳhānoñ meñ baañT kar

qistoñ meñ ḳhud-kushī ke vasā.il hue haiñ log

'anvar' abhī to shahr-e-ta.alluq kī raah meñ

dīvār-e-chīn kī tarah haa.il hue haiñ log

shishe ka ghar samajh ke jo mail hue hain log

KHud apne pattharon se hi ghail hue hain log

hal ho nahin rahe hain hazaron nashist mein

kuchh is tarah se uljhe masail hue hain log

chehron pe gham ki suiyan chalti hain roz-o-shab

jaise purani ghaDiyon ke Dial hue hain log

aabaadiyon ki barf ki sil par khaDe hue

sahra ki tarah pyas ke sail hue hain log

roz-o-shab-e-hayat ke KHanon mein banT kar

qiston mein KHud-kushi ke wasail hue hain log

'anwar' abhi to shahr-e-talluq ki rah mein

diwar-e-chin ki tarah hail hue hain log