shikayat kar rahe hain sajda-ha-e-raegan mujhse

shikāyat kar rahe haiñ sajda-hā-e-rā.egāñ mujh se

na dekhā jā.egā ab sū-e-sañg-e-āstāñ mujh se

hai kal kī baat sharminda thā husn-e-rā.egāñ mujh se

ye jalve māñgte the ik nigāh-e-mehrbāñ mujh se

nazar rakh kar qanā.at kar rahā huuñ maiñ tasavvur par

ye jalve chāhte haiñ aur kyā qurbāniyāñ mujh se

mohabbat merī baḌh kar aa ga.ī hai bad-gumānī tak!

mazā aa jaa.e ho jaa.eñ jo vo bhī bad-gumāñ mujh se

mashiyyat chāhtī thī mujh ko mahv-e-ḳhvāb meñ rakhnā

maiñ kyā kartā na rokī jā sakīñ añgḌā.iyāñ mujh se

karishme qudrat-e-mutlaq ke haiñ bālā-e-shak lekin

maiñ jab jānūñ ki baḌh kar chhīn leñ majbūriyāñ mujh se

junūñ-jaulān-e-dasht-e-justujū huuñ kyā ḳhabar is kī

milī manzil kahāñ mujh ko chhuTī manzil kahāñ mujh se

shikayat kar rahe hain sajda-ha-e-raegan mujh se

na dekha jaega ab su-e-sang-e-astan mujh se

hai kal ki baat sharminda tha husn-e-raegan mujh se

ye jalwe mangte the ek nigah-e-mehrban mujh se

nazar rakh kar qanaat kar raha hun main tasawwur par

ye jalwe chahte hain aur kya qurbaniyan mujh se

mohabbat meri baDh kar aa gai hai bad-gumani tak!

maza aa jae ho jaen jo wo bhi bad-guman mujh se

mashiyyat chahti thi mujh ko mahw-e-KHwab mein rakhna

main kya karta na roki ja sakin angDaiyan mujh se

karishme qudrat-e-mutlaq ke hain baala-e-shak lekin

main jab jaanun ki baDh kar chhin len majburiyan mujh se

junun-jaulan-e-dasht-e-justuju hun kya KHabar is ki

mili manzil kahan mujh ko chhuTi manzil kahan mujh se