شکایتوں سے الجھنے لگی حیات کی ڈور

شکایتوں سے الجھنے لگی حیات کی ڈور

مجھے یہ ڈر ہے کٹے نہ تعلقات کی ڈور

گزر وہاں کسی سورج کا ہو نہیں سکتا

چراغ تھامے ہوئے ہیں جہاں پہ رات کی ڈور

وہ ایک شب مرے ہاتھوں میں ہاتھ تیرا تھا

لگا کہ آ گئی ہاتھوں میں کائنات کی ڈور

غزل کے ریشمی دھاگوں سے مت لڑا شاعر

بہت ہی سخت ہے ناقد کے تجربات کی ڈور

تمام عمر نچاتی ہے ہم کو انگلی پر

عجیب ہوتی ہے صاحب یہ خواہشات کی ڈور

میں خود سے ایک بھی لمحہ بری نہیں ہوتا

دل و دماغ کو باندھے ہے التفات کی ڈور

کسی کی ڈور کی تیزی کے ہم نہیں قائل

خود اپنی ذات سے کٹتی ہے اپنی ذات کی ڈور

بہت سنبھال کے رکھ اپنی زندگی اے دل

پھسل نہ جائے کسی دن تمہارے ہاتھ کی ڈور