shikayaton se ulajhne lagi hayat ki Dor

shikāyatoñ se ulajhne lagī hayāt kī Dor

mujhe ye Dar hai kaTe na ta'alluqāt kī Dor

guzar vahāñ kisī sūraj kā ho nahīñ saktā

charāġh thāme hue haiñ jahāñ pe raat kī Dor

vo ek shab mire hāthoñ meñ haath terā thā

lagā ki aa ga.ī hāthoñ meñ kā.enāt kī Dor

ġhazal ke reshmī dhāgoñ se mat laḌā shā'ir

bahut hī saḳht hai nāqid ke tajrabāt kī Dor

tamām 'umr nachātī hai ham ko unglī par

'ajīb hotī hai sāhib ye ḳhvāhishāt kī Dor

maiñ ḳhud se ek bhī lamha barī nahīñ hotā

dil-o-dimāġh ko bāñdhe hai iltifāt kī Dor

kisī kī Dor kī tezī ke ham nahīñ qaa.il

ḳhud apnī zaat se kaTtī hai apnī zaat kī Dor

bahut sañbhāl ke rakh apnī zindagī ai dil

phisal na jaa.e kisī din tumhāre haath kī Dor

shikayaton se ulajhne lagi hayat ki Dor

mujhe ye Dar hai kaTe na ta'alluqat ki Dor

guzar wahan kisi suraj ka ho nahin sakta

charagh thame hue hain jahan pe raat ki Dor

wo ek shab mere hathon mein hath tera tha

laga ki aa gai hathon mein kaenat ki Dor

ghazal ke reshmi dhagon se mat laDa sha'ir

bahut hi saKHt hai naqid ke tajrabaat ki Dor

tamam 'umr nachati hai hum ko ungli par

'ajib hoti hai sahib ye KHwahishat ki Dor

main KHud se ek bhi lamha bari nahin hota

dil-o-dimagh ko bandhe hai iltifat ki Dor

kisi ki Dor ki tezi ke hum nahin qail

KHud apni zat se kaTti hai apni zat ki Dor

bahut sanbhaal ke rakh apni zindagi ai dil

phisal na jae kisi din tumhaare hath ki Dor