shikast de ke mujhe dar par sajata hai

shikast de ke mujhe daar par sajātā hai

vo apnī jiit mirī haar par sajātā hai

mizāj-e-yār tirī barhamī ke dil sadqe

ajiib rang ruḳh-e-yār par sajātā hai

ik aise lamha-e-tanhā.ī se maiñ vāqif huuñ

vo jab mujhe lab-o-ruḳhsār par sajātā hai

tire divāne ko tasvīr mil ga.ī hai tirī

badal badal ke jo dīvār par sajātā hai

use pasand nahīñ motiye ke phuul magar

kalā.ī meñ mire isrār par sajātā hai

vo jis ke aib hunar se badal diye maiñ ne

vo tohmateñ mire kirdār par sajātā hai

'salīm' 'fauz' safā.ī meñ kuchh nahīñ kahnā

gale meñ tauq vo iz.hār par sajātā hai

shikast de ke mujhe dar par sajata hai

wo apni jit meri haar par sajata hai

mizaj-e-yar teri barhami ke dil sadqe

ajib rang ruKH-e-yar par sajata hai

ek aise lamha-e-tanhai se main waqif hun

wo jab mujhe lab-o-ruKHsar par sajata hai

tere diwane ko taswir mil gai hai teri

badal badal ke jo diwar par sajata hai

use pasand nahin motiye ke phul magar

kalai mein mere israr par sajata hai

wo jis ke aib hunar se badal diye main ne

wo tohmaten mere kirdar par sajata hai

'salim' 'fauz' safai mein kuchh nahin kahna

gale mein tauq wo izhaar par sajata hai