shikast-e-jaan se siwa bhi hai kar-e-fan kya kya

shikast-e-jāñ se sivā bhī hai kār-e-fan kyā kyā

azaab khīñch rahā hai mirā badan kyā kyā

na koī hijr kā din hai na koī vasl kī raat

magar vo shaḳhs ki hai jān-e-anjuman kyā kyā

adā huī hai ka.ī baar tark-e-ishq kī rasm

magar hai sar pe vahī qarz-e-jān-o-tan kyā kyā

nigāh-e-bulhavasāñ haa.e kyā qayāmat hai

badal rahe haiñ gul-o-lāla pairahan kyā kyā

guzar ga.e to guzarte rahe bahut ḳhurshīd

jo rañg laa.ī to laa.ī hai ik kiran kyā kyā

qarīb thā ki maiñ kār-e-junūñ se baaz aa.uuñ

khiñchī ḳhayāl meñ tasvīr-e-kohkan kyā kyā

shikast-e-jaan se siwa bhi hai kar-e-fan kya kya

azab khinch raha hai mera badan kya kya

na koi hijr ka din hai na koi wasl ki raat

magar wo shaKHs ki hai jaan-e-anjuman kya kya

ada hui hai kai bar tark-e-ishq ki rasm

magar hai sar pe wahi qarz-e-jaan-o-tan kya kya

nigah-e-bulhawasan hae kya qayamat hai

badal rahe hain gul-o-lala pairahan kya kya

guzar gae to guzarte rahe bahut KHurshid

jo rang lai to lai hai ek kiran kya kya

qarib tha ki main kar-e-junun se baz aaun

khinchi KHayal mein taswir-e-kohkan kya kya