shikasta chhat mein parindon ko jab Thikana mila

shikasta chhat meñ parindoñ ko jab Thikāna milā

maiñ ḳhush huā ki mire ghar ko bhī gharānā milā

falak pe uḌte hue bhī nazar zamīñ pe rahī

mizāj mujh ko muqaddar se tā.irāna milā

ham is ke husn-e-suḳhan kī dalīl kyā deñge

vo jitnī baar milā ham se barmalā na milā

kisī kī dekhtī āñkheñ bhī aas paas raheñ

tujhe milā to ba ehsās-e-mujrimāna milā

maiñ apnī baat daraḳhtoñ se kah ke rotā huuñ

ki mere ġham ko kisī rut na āshiyāna milā

ab aa gayā hai to chup-chāp ḳhāmushī ko san

mire sukūt meñ apnī koī sadā na milā

laḌī sī TuuT ke āñkhoñ se gir paḌī 'nayyar'

laboñ se harf kā koī bhī silsila na milā

shikasta chhat mein parindon ko jab Thikana mila

main KHush hua ki mere ghar ko bhi gharana mila

falak pe uDte hue bhi nazar zamin pe rahi

mizaj mujh ko muqaddar se tairana mila

hum is ke husn-e-suKHan ki dalil kya denge

wo jitni bar mila hum se barmala na mila

kisi ki dekhti aankhen bhi aas pas rahen

tujhe mila to ba ehsas-e-mujrimana mila

main apni baat daraKHton se kah ke rota hun

ki mere gham ko kisi rut na aashiyana mila

ab aa gaya hai to chup-chap KHamushi ko san

mere sukut mein apni koi sada na mila

laDi si TuT ke aankhon se gir paDi 'nayyar'

labon se harf ka koi bhi silsila na mila