shikasta dil tahi-daman ba-chashm-e-tar gaya aaKHir

shikasta dil tahī-dāman ba-chashm-e-tar gayā āḳhir

sanam mil kar hameñ phir aaj tanhā kar gayā āḳhir

ġharīb-e-shahr thā ḳhāmosh rahne kī sazā paa.ī

vafā karne pe bhī ilzām us ke sar gayā āḳhir

baḌhā kar haath ulfat kā sadā kī bekalī de dī

tumhārī chaah kar ke ek shā.ir mar gayā āḳhir

ye tai thā ham anā ke faisle se muñh na moḌeñge

rahī dastār qaa.em tan se lekin sar gayā āḳhir

fanā ke haath apnī zindagī ko chhū na sakte the

magar mālik tirī duniyā se ye dil bhar gayā āḳhir

thakan se chuur thā us kā badan aur aañkh bojhal thī

vo shab bhar ghar se bāhar thā palaT kar ghar gayā āḳhir

vo jis kī justujū meñ ham ne apnī zindagī kho dī

vahī to aaj 'hasrat' ham pe tohmat dhar gayā āḳhir

shikasta dil tahi-daman ba-chashm-e-tar gaya aaKHir

sanam mil kar hamein phir aaj tanha kar gaya aaKHir

gharib-e-shahr tha KHamosh rahne ki saza pai

wafa karne pe bhi ilzam us ke sar gaya aaKHir

baDha kar hath ulfat ka sada ki bekali de di

tumhaari chah kar ke ek shair mar gaya aaKHir

ye tai tha hum ana ke faisle se munh na moDenge

rahi dastar qaem tan se lekin sar gaya aaKHir

fana ke hath apni zindagi ko chhu na sakte the

magar malik teri duniya se ye dil bhar gaya aaKHir

thakan se chur tha us ka badan aur aankh bojhal thi

wo shab bhar ghar se bahar tha palaT kar ghar gaya aaKHir

wo jis ki justuju mein hum ne apni zindagi kho di

wahi to aaj 'hasrat' hum pe tohmat dhar gaya aaKHir