shikasta-dil the tera etibar kya karte

shikasta-dil the tirā e'tibār kyā karte

jo e'tibār bhī karte to pyaar kyā karte

zarā sī der ko baiThe the phir uThā na gayā

shajar hī aisā thā vo sāya-dār kyā karte

shab intizār meñ din yād-e-yār meñ kaaTe

ab aur izzat-e-lail-o-nahār kyā karte

kabhī qadam safar-e-shauq meñ ruke hī nahīñ

to sañg-e-mīl bhalā ham shumār kyā karte

sitam-shanās-e-mohabbat to jaañ pe khel ga.e

nishāna-e-sitam-e-rozgār kyā karte

hamārī aañkh meñ aañsū na us ke lab pe hañsī

ḳhayāl ḳhātir-e-abr-e-bahār kyā karte

vo nā-pasand thā lekin use bhulāyā nahīñ

jo baat bas meñ na thī iḳhtiyār kyā karte

darūn-e-ḳhāna-e-dil kaisā shor hai 'sājid'

hameñ ḳhabar thī magar āshkār kyā karte

shikasta-dil the tera e'tibar kya karte

jo e'tibar bhi karte to pyar kya karte

zara si der ko baiThe the phir uTha na gaya

shajar hi aisa tha wo saya-dar kya karte

shab intizar mein din yaad-e-yar mein kaTe

ab aur izzat-e-lail-o-nahaar kya karte

kabhi qadam safar-e-shauq mein ruke hi nahin

to sang-e-mil bhala hum shumar kya karte

sitam-shanas-e-mohabbat to jaan pe khel gae

nishana-e-sitam-e-rozgar kya karte

hamari aankh mein aansu na us ke lab pe hansi

KHayal KHatir-e-abr-e-bahaar kya karte

wo na-pasand tha lekin use bhulaya nahin

jo baat bas mein na thi iKHtiyar kya karte

darun-e-KHana-e-dil kaisa shor hai 'sajid'

hamein KHabar thi magar aashkar kya karte