shikasta jism darida jabin ki jaanib

shikasta jism darīda jabīn kī jānib

kabhī to dekh mire ham-nashīn kī jānib

maiñ apnā zaḳhm dikhā.ūñ tujhe ki maiñ dekhūñ

lahū meñ Duubī huī āstīn kī jānib

in āsmān-mizājoñ se hai balā kā gurez

palaT rahā huuñ maiñ apnī zamīn kī jānib

kuchh apne harf ke motī kuchh apne lafz ke phuul

uchhāl aaya huuñ us nāznīn kī jānib

kisī kī chashm ta.āqub kī zad meñ rahtā huuñ

maiñ dekhtā huuñ jab us mah-jabīn kī jānib

ḳhud apne hone pe mujh ko yaqīn hai lekin

maiñ dekhtā huuñ gumāñ se yaqīn kī jānib

masāf-e-jāñ meñ khaḌā huuñ mire adū se kaho

vo dekhtā hai yasār-o-yamīn kī jānib

kisī ne thaam lī baḌh kar mire faras kī rikāb

kisī ne haath baḌhāyā thā ziin kī jānib

ḳhud apne fan kā ye 'shāhid' kamāl hai naqqād

vo dekhtā hī nahīñ nāqidīn kī jānib

shikasta jism darida jabin ki jaanib

kabhi to dekh mere ham-nashin ki jaanib

main apna zaKHm dikhaun tujhe ki main dekhun

lahu mein Dubi hui aastin ki jaanib

in aasman-mizajon se hai bala ka gurez

palaT raha hun main apni zamin ki jaanib

kuchh apne harf ke moti kuchh apne lafz ke phul

uchhaal aaya hun us naznin ki jaanib

kisi ki chashm taaqub ki zad mein rahta hun

main dekhta hun jab us mah-jabin ki jaanib

KHud apne hone pe mujh ko yaqin hai lekin

main dekhta hun guman se yaqin ki jaanib

masaf-e-jaan mein khaDa hun mere adu se kaho

wo dekhta hai yasar-o-yamin ki jaanib

kisi ne tham li baDh kar mere faras ki rikab

kisi ne hath baDhaya tha zin ki jaanib

KHud apne fan ka ye 'shahid' kamal hai naqqad

wo dekhta hi nahin naqidin ki jaanib