shikasta-par hai ye unchi uDan rakhta hai

shikasta-par hai ye ūñchī uḌaan rakhtā hai

parinda hai to parinde kī shaan rakhtā hai

bahut hī būḌhā sahī par isī shajar se ghar

tamām shahr meñ ik ān-bān rakhtā hai

ajab hī chiiz hai āñchal bhī maañ kā ai logo

ki sar to jaise koī āsmān rakhtā hai

vo shaḳhs jo mire har faisle kā thā pāband

savāliya mire aage nishān rakhtā hai

huī hai bāloñ kī chāñdī se baat ye raushan

vo pā-e-umr kī sar par takān rakhtā hai

vo shohratoñ ke bayābāñ meñ Thahrā lā-sānī

ki sarv se kahīñ baḌh kar uThān rakhtā hai

agarche va.ada nahīñ phir bhī jaane kyoñ 'āmir'

ye dil usī kī hī aahaT pe kaan rakhtā hai

shikasta-par hai ye unchi uDan rakhta hai

parinda hai to parinde ki shan rakhta hai

bahut hi buDha sahi par isi shajar se ghar

tamam shahr mein ek aan-ban rakhta hai

ajab hi chiz hai aanchal bhi man ka ai logo

ki sar to jaise koi aasman rakhta hai

wo shaKHs jo mere har faisle ka tha paband

sawaliya mere aage nishan rakhta hai

hui hai baalon ki chandi se baat ye raushan

wo pa-e-umr ki sar par takan rakhta hai

wo shohraton ke bayaban mein Thahra la-sani

ki sarw se kahin baDh kar uThan rakhta hai

agarche wada nahin phir bhi jaane kyon 'amir'

ye dil usi ki hi aahaT pe kan rakhta hai