shikwa-e-baKHT hai fuzul gardish-e-rozgar kya

shikva-e-baḳhT hai fuzūl gardish-e-rozgār kyā

vaqt kī tū bisāt ulaT baiThā hai sogvār kyā

pursish-e-ġham se aa gayā dil ko mire qarār kyā

mujh ko sukūn mil gayā ai mere ġham-gusār kyā

dil meñ ho soz-e-ishq agar phir ġham-e-rozgār kyā

dhuup bhī phir to chhāñv hai kaisī ḳhizāñ bahār kyā

hijr kī raat kaT ga.ī dard bhī dil kā tham gayā

terī ravish badal ga.ī gardish-e-rozgār kyā

ġham hai hamārī zindagī dard hai husn-e-zindagī

ab hameñ un se kyā gila ab hameñ ġham se aar kyā

tuur pe tum the jalva-gar hosh meñ kab kalīm the

dekhne vaalā jab na ho husn kī phir bahār kyā

sun ke rumūz-e-aql-o-hosh ahl-e-ḳhirad pukār uThe

ahl-e-junūñ ko mil gayā aql pe iḳhtiyār kyā

shikwa-e-baKHT hai fuzul gardish-e-rozgar kya

waqt ki tu bisat ulaT baiTha hai sogwar kya

pursish-e-gham se aa gaya dil ko mere qarar kya

mujh ko sukun mil gaya ai mere gham-gusar kya

dil mein ho soz-e-ishq agar phir gham-e-rozgar kya

dhup bhi phir to chhanw hai kaisi KHizan bahaar kya

hijr ki raat kaT gai dard bhi dil ka tham gaya

teri rawish badal gai gardish-e-rozgar kya

gham hai hamari zindagi dard hai husn-e-zindagi

ab hamein un se kya gila ab hamein gham se aar kya

tur pe tum the jalwa-gar hosh mein kab kalim the

dekhne wala jab na ho husn ki phir bahaar kya

sun ke rumuz-e-aql-o-hosh ahl-e-KHirad pukar uThe

ahl-e-junun ko mil gaya aql pe iKHtiyar kya