shikwa-e-gham bhi gaya taqat-e-goyai bhi

shikva-e-ġham bhī gayā tāqat-e-goyā.ī bhī

bhuul jaatā huuñ koī baat jo yaad aa.ī bhī

dekhnā bhī nahīñ us samt gavārā un ko

ḳhatm hai silsila-e-hausla-afzā.ī bhī

jab se andāz-e-bahārāñ meñ taġhayyur aayā

miT gayā dil se ḳhayāl-e-chaman-ārī.ī bhī

har taraf bāñg-e-jaras bāñg-e-darā bāñg-e-azāñ

sone vaale haiñ ki lete nahīñ añgḌā.ī bhī

kaun ab ham ko tajallī kī haqīqat samjhā.e

ho ga.e gum tire jalvoñ meñ tamāshā.ī bhī

kitnī mushkil hai kisī sher kī tahlīl 'nasīr'

kitnī dushvār hai ehsās kī gīrā.ī bhī

shikwa-e-gham bhi gaya taqat-e-goyai bhi

bhul jata hun koi baat jo yaad aai bhi

dekhna bhi nahin us samt gawara un ko

KHatm hai silsila-e-hausla-afzai bhi

jab se andaz-e-bahaaran mein taghayyur aaya

miT gaya dil se KHayal-e-chaman-arii bhi

har taraf bang-e-jaras bang-e-dara bang-e-azan

sone wale hain ki lete nahin angDai bhi

kaun ab hum ko tajalli ki haqiqat samjhae

ho gae gum tere jalwon mein tamashai bhi

kitni mushkil hai kisi sher ki tahlil 'nasir'

kitni dushwar hai ehsas ki girai bhi