shikwa-e-gardish-e-taqdir se kya hota hai

shikva-e-gardish-e-taqdīr se kyā hotā hai

kārsāz ahl-e-mohabbat kā ḳhudā hotā hai

shikve hote haiñ mohabbat meñ gila hotā hai

koī apnoñ se bhī is tarah ḳhafā hotā hai

muskurā.e vo mire ġham kī hikāyat sun kar

shāyad ab un ko bhī ehsās-e-jafā hotā hai

aa hī jaatā hai mohabbat meñ ik aisā lamha

mudda.ā dil kā jab āñkhoñ se adā hotā hai

ik qayāmat sī guzar jaatī hai apne dil par

jab gale mil ke koī ham se judā hotā hai

dil dhaḌaktā hai ki anjām na jaane kyā ho

jab kabhī lutf-o-karam un kā sivā hotā hai

ishq ke nāla-e-mahrūm rasā ho ke rahe

ab taġhāful bhī ba-unvān-e-vafā hotā hai

shikva-e-gardish-e-ayyām se hāsil ai 'soz'

qaid-e-hastī se koī yuuñ bhī rihā hotā hai

shikwa-e-gardish-e-taqdir se kya hota hai

karsaz ahl-e-mohabbat ka KHuda hota hai

shikwe hote hain mohabbat mein gila hota hai

koi apnon se bhi is tarah KHafa hota hai

muskurae wo mere gham ki hikayat sun kar

shayad ab un ko bhi ehsas-e-jafa hota hai

aa hi jata hai mohabbat mein ek aisa lamha

muddaa dil ka jab aankhon se ada hota hai

ek qayamat si guzar jati hai apne dil par

jab gale mil ke koi hum se juda hota hai

dil dhaDakta hai ki anjam na jaane kya ho

jab kabhi lutf-o-karam un ka siwa hota hai

ishq ke nala-e-mahrum rasa ho ke rahe

ab taghaful bhi ba-unwan-e-wafa hota hai

shikwa-e-gardish-e-ayyam se hasil ai 'soz'

qaid-e-hasti se koi yun bhi riha hota hai