shikwa-e-kasrat-e-bedad karun ya na karun

shikva-e-kasrat-e-bedād karūñ yā na karūñ

ḳhātir-e-husn ko nāshād karūñ yā na karūñ

dil-e-barbād ko ābād karūñ yā na karūñ

sochtā huuñ ki tujhe yaad karūñ yā na karūñ

āsmāñ mujh se hirāsāñ hī rahā kartā hai

ḳhvāh maiñ nāla-o-fariyād karūñ yā na karūñ

ḳhud bhī sayyād pareshāñ hai mujhe kar ke asiir

sochtā hai ise āzād karūñ yā na karūñ

jaur-e-gulchīñ hai ki baḌhtā hī chalā jaatā hai

jaur-e-gulchīñ pe maiñ fariyād karūñ yā na karūñ

mausam-e-gul kī hasīñ shaam hai mai-ḳhāna-ba-dosh

saaqī aise meñ tujhe yaad karūñ yā na karūñ

zindagī kaif-ba-dāmāñ thī mirī jab 'aḳhtar'

ab vo biite hue din yaad karūñ yā na karūñ

shikwa-e-kasrat-e-bedad karun ya na karun

KHatir-e-husn ko nashad karun ya na karun

dil-e-barbaad ko aabaad karun ya na karun

sochta hun ki tujhe yaad karun ya na karun

aasman mujh se hirasan hi raha karta hai

KHwah main nala-o-fariyaad karun ya na karun

KHud bhi sayyaad pareshan hai mujhe kar ke asir

sochta hai ise aazad karun ya na karun

jaur-e-gulchin hai ki baDhta hi chala jata hai

jaur-e-gulchin pe main fariyaad karun ya na karun

mausam-e-gul ki hasin sham hai mai-KHana-ba-dosh

saqi aise mein tujhe yaad karun ya na karun

zindagi kaif-ba-daman thi meri jab 'aKHtar'

ab wo bite hue din yaad karun ya na karun