shikwa jo mera ashk mein Dhalta chala gaya

shikva jo merā ashk meñ Dhaltā chalā gayā

saarā ġhubār dil kā nikaltā chalā gayā

raushan kiyā umiid ne yuuñ jāda-e-hayāt

har gaam pe charāġh sā jaltā chalā gayā

raas aa sakī sukūñ ko nā tadbīr-e-zabt-e-ġham

āñkhoñ se ḳhuun dil kā ubaltā chalā gayā

jis par mire fareb-e-tamannā ko naaz thā

vo din bhī intizār meñ Dhaltā chalā gayā

pichhle pahar jo sham' ne khīñchī ik āh-e-sard

chehre kā un ke rañg badaltā chalā gayā

baḌhne lagī yaqīn o gumāñ meñ jo kashmakash

vā'da bhī sub.h o shaam pe Taltā chalā gayā

vo nauha-e-alam ho ki 'nayyar' navā-e-shauq

har naġhma ek saaz meñ Dhaltā chalā gayā

shikwa jo mera ashk mein Dhalta chala gaya

sara ghubar dil ka nikalta chala gaya

raushan kiya umid ne yun jada-e-hayat

har gam pe charagh sa jalta chala gaya

ras aa saki sukun ko na tadbir-e-zabt-e-gham

aankhon se KHun dil ka ubalta chala gaya

jis par mere fareb-e-tamanna ko naz tha

wo din bhi intizar mein Dhalta chala gaya

pichhle pahar jo sham' ne khinchi ek aah-e-sard

chehre ka un ke rang badalta chala gaya

baDhne lagi yaqin o guman mein jo kashmakash

wa'da bhi subh o sham pe Talta chala gaya

wo nauha-e-alam ho ki 'nayyar' nawa-e-shauq

har naghma ek saz mein Dhalta chala gaya