shikwa karte hain zaban se na gila karte hain

shikva karte haiñ zabāñ se na gilā karte haiñ

tum salāmat raho ham to ye duā karte haiñ

phir mire dil ke phañsāne kī huī hai tadbīr

phir na.e sar se vo paimān-e-vafā karte haiñ

tum mujhe haath uThā kar is adā se koso

dekhne vaale ye samjheñ ki duā karte haiñ

in hasīnoñ kā hai duniyā se nirālā andāz

shoḳhiyāñ bazm meñ ḳhalvat meñ hayā karte haiñ

hashr kā zikr na kar us kī galī meñ vaa.iz

aise hañgāme yahāñ roz huā karte haiñ

laag hai ham se adū ko to adū se hameñ rashk

ek hī aag meñ ham donoñ jalā karte haiñ

un kā shikva na raqīboñ kī shikāyat hai 'hafīz'

sirf ham apne muqaddar kā gilā karte haiñ

shikwa karte hain zaban se na gila karte hain

tum salamat raho hum to ye dua karte hain

phir mere dil ke phansane ki hui hai tadbir

phir nae sar se wo paiman-e-wafa karte hain

tum mujhe hath uTha kar is ada se koso

dekhne wale ye samjhen ki dua karte hain

in hasinon ka hai duniya se nirala andaz

shoKHiyan bazm mein KHalwat mein haya karte hain

hashr ka zikr na kar us ki gali mein waiz

aise hangame yahan roz hua karte hain

lag hai hum se adu ko to adu se hamein rashk

ek hi aag mein hum donon jala karte hain

un ka shikwa na raqibon ki shikayat hai 'hafiz'

sirf hum apne muqaddar ka gila karte hain