شکوہ کس کس سے کریں سب ہی ستم گر نکلے

شکوہ کس کس سے کریں سب ہی ستم گر نکلے

نئے دشمن تو پرانے سے بھی بڑھ کر نکلے

دل کا عالم کہ کوئی راس نہ آیا اس کو

جانے کتنے ہی حسیں پیار کے منظر نکلے

سامنے سے تو بہت پیار جتایا سب نے

مڑ کے دیکھا تو کئی پیٹھ پہ خنجر نکلے

آسماں کو میں اگر اپنی ہتھیلی پہ رکھوں

تب کہیں جا کے مرے قد کے برابر نکلے

خاک ملتے ہوئے چلتی ہے جہاں کی عظمت

عشق کے کوچہ سے جب کوئی قلندر نکلے

کچھ بھی حاصل نہیں ہوتا ہے کنارے پے کبھی

ڈوب جائیں جو سمندر میں تو گوہر نکلے

جب سے ویران ہوئی بستی مرے سپنوں کی

میری آنکھوں سے کئی سرخ سمندر نکلے

اسی امید پہ جیتے ہیں جہاں میں ہم لوگ

کل کا دن آج کی اس شام سے بہتر نکلے

صاحبہؔ سینچتے ہیں خون جگر سے جس کو

ہے یہ ممکن کے وہی پھول بھی پتھر نکلے