شکوہ نہ ہو تسلسل آہ و فغاں رہے

شکوہ نہ ہو تسلسل آہ و فغاں رہے

وہ چاہتے ہیں آگ نہ بھڑکے دھواں رہے

لیل و نہار پہلے جو تھے اب کہاں رہے

ہاں یاد ہے کہ تم بھی کبھی مہرباں رہے

قربت میں آ پڑے تھے قیامت کے فاصلے

تنہا تھے ہم تو قول و قسم درمیاں رہے

ہر گام پر ہیں دار و رسن کی سہولتیں

اب جسم و جاں لٹاؤ کہ نام و نشاں رہے

یوں مسکرا کے ترک تعلق کی گفتگو

ایسا ستم کہ جس پہ کرم کا گماں رہے

راہوں کے پیچ و خم میں مسافر بکھر گئے

اب کارواں قیام کرے یا رواں رہے

خوشبوئے پیرہن میں بسا ہے رواں رواں

وہ ہم سے لاکھ دور رہے جزو جاں رہے