shikwa na ho tasalsul-e-ah-o-fughan rahe

shikva na ho tasalsul-e-āh-o-fuġhāñ rahe

vo chāhte haiñ aag na bhaḌke dhuāñ rahe

lail-o-nahār pahle jo the ab kahāñ rahe

haañ yaad hai ki tum bhī kabhī mehrbāñ rahe

qurbat meñ aa paḌe the qayāmat ke fāsle

tanhā the ham to qaul-o-qasam darmiyāñ rahe

har gaam par haiñ dār-o-rasan kī sahūlateñ

ab jism-o-jāñ luTāo ki nām-o-nishāñ rahe

yuuñ muskurā ke tark-e-ta.alluq kī guftugū

aisā sitam ki jis pe karam kā gumāñ rahe

rāhoñ ke pech-o-ḳham meñ musāfir bikhar ga.e

ab kārvāñ qayām kare yā ravāñ rahe

ḳhushbū-e-pairahan meñ basā hai ruvāñ ruvāñ

vo ham se laakh duur rahe juzv-e-jāñ rahe

shikwa na ho tasalsul-e-ah-o-fughan rahe

wo chahte hain aag na bhaDke dhuan rahe

lail-o-nahaar pahle jo the ab kahan rahe

han yaad hai ki tum bhi kabhi mehrban rahe

qurbat mein aa paDe the qayamat ke fasle

tanha the hum to qaul-o-qasam darmiyan rahe

har gam par hain dar-o-rasan ki sahulaten

ab jism-o-jaan luTao ki nam-o-nishan rahe

yun muskura ke tark-e-talluq ki guftugu

aisa sitam ki jis pe karam ka guman rahe

rahon ke pech-o-KHam mein musafir bikhar gae

ab karwan qayam kare ya rawan rahe

KHushbu-e-pairahan mein basa hai ruwan ruwan

wo hum se lakh dur rahe juzw-e-jaan rahe