shikwa na karenge kabhi hum barq-o-sharar se

shikva na kareñge kabhī ham barq-o-sharar se

gulshan meñ to ḳhud aag lagī hai gul-e-tar se

vo log to sāhil pe bhī Dūbeñge yaqīnan

ghabrā ke palaTte haiñ jo tūfān ke Dar se

tar-dāmanī pe tanz na kar merī ai vaa.iz

dāman na kahīñ tar ho tirā dāman-e-tar se

kyā koī mah-e-ḳhūbī nikal aayā sar-e-shām

taare bhī nazar aate gardūñ meñ sharar se

ye kaisā hai dastūr tirī bazm kā saaqī

ḳhum koī luñDhā.e to koī buuñd ko tarse

vo mujh se lipaT jaate haiñ bādal kī garaj se

allāh kare ab ye ghaTā jhuum ke barse

jibra.īl ke par jalte haiñ jis jā pe ai hamdam

'rūmānī' vahāñ pahuñchā hai taḳh.īl ke par se

shikwa na karenge kabhi hum barq-o-sharar se

gulshan mein to KHud aag lagi hai gul-e-tar se

wo log to sahil pe bhi Dubenge yaqinan

ghabra ke palaTte hain jo tufan ke Dar se

tar-damani pe tanz na kar meri ai waiz

daman na kahin tar ho tera daman-e-tar se

kya koi mah-e-KHubi nikal aaya sar-e-sham

tare bhi nazar aate gardun mein sharar se

ye kaisa hai dastur teri bazm ka saqi

KHum koi lunDhae to koi bund ko tarse

wo mujh se lipaT jate hain baadal ki garaj se

allah kare ab ye ghaTa jhum ke barse

jibrail ke par jalte hain jis ja pe ai hamdam

'rumani' wahan pahuncha hai taKHil ke par se